பிரெஞ்சு ஓபன்: ஷரபோவாவை வீழ்த்தி செரீனா சாம்பியன்
பாரிஸ், ஜூன் 8:
பிரெஞ்சு ஓபன் டென்னிஸ் போட்டியில் இன்று மகளிர் ஒற்றையர் பிரிவில் சாம்பியன் கோப்பைக்கான இறுதிப் போட்டி நடைபெற்றது. இதில் நம்பர் ஒன் வீராங்கனையான அமெரிக்காவின் செரீனா வில்லியம்சும், நடப்பு சாம்பியனும் 2-ம் நிலை வீராங்கனையுமான ரஷியாவின் மரிய ஷரபோவாவும் பலப்பரீட்சை நடத்தினர்.
தொடர் வெற்றிகளைக் குவித்து வரும் செரீனா, ஆரம்பம் முதலே ஆட்டத்தினை தனது கட்டுப்பாட்டிற்குள் வைத்திருந்தார். இதனால் முதல் செட்டை 6-4 என எளிதாக கைப்பற்றினார். அடுத்த செட்டில் ஷரபோவா கடுமையாக போராடினார். ஆனால், செரீனாவின் அனுபவ ஆட்டத்தின் முன்னால் அவரது முயற்சி பலிக்கவில்லை. எனவே, அந்த செட்டையும் 6-4 என்ற கணக்கில் செரீனா கைப்பற்றி சாம்பியன் கோப்பையை வென்றார். இதன்மூலம், செரீனா வில்லியம்ஸ் பிரெஞ்சு ஓபன் பட்டத்தை இரண்டாவது முறையாக வென்றுள்ளார்.
இதுவரை செரீனாவும், ஷரபோவாவும் 16 முறை நேருக்கு நேர் மோதியுள்ளனர். இதில் 14 முறை செரீனா வெற்றி பெற்றுள்ளார். 2004-ம் ஆண்டுக்குப் பிறகு ஷரபோவாவிடம் ஒருமுறை கூட அவர் தோல்வியடைந்ததில்லை என்பது குறிப்பிடத்தக்கது.
0 comments